فصحتك ليوم غادي نتعرفوا على الإجراءات لي خاصكم تتبعوها الى تعرضتوا للعضة ديال قنديل البحر أولا كيفما معروف عند العامة “لاكوابيبا” ولي حوالي 150 مليون شخص حول العالم كيتعرضوا كل عام للعضة ديالو، لأنه كيلدغ بواسطة المخالب لي كتحتوي على سم كوسيلة للدفاع عن النفس.
وكاين حوالي 2000 نوع ديال قناديل البحر، وكل نوع عندوا تأثير وأعراض كتظهر على المصاب بطريقة مختلفة ولي ممكن تبدا فالأول غير بالشعور بالألم وتوصل فبعض الأحيان لأعراض كتهدد حياة المصاب. وهدشي بحسب استجابة الجسم للدغة، ونوع السم والكمية ديالو فالجلد.
إذن الى تعرض شي شخص لعضة قنديل البحر وظهرات عليه الأعراض لي كتمثل فتغير لون المنطقة المصابة واحمرارها، الشعور بالدوخة والدوار، حكة وتورم موضعي وألم في الذراعين والساقين معليكم غير تتبعوا النصائح التالية:
- أول حاجة إخراج المصاب من الماء فالحال ثم غسل المنطقة المصابة بماء مالح للتخلص من اثار عضة قنديل البحر.
- بعد ذلك كيتوجب إزالة الأجزاء لي كتلامس سطح الجلد، لكن خاص التنويه هنا على ضرورة إجراء هاد الخطوة بالقفازات وماشي باليدين العاريتين، بحيث تقدروا حتى نتوما استصابوا.
- الخطوة الأخيرة كتمثل فشفط المنطقة المصابة وصب الماء الساخن على الاصابة بشرط مايكونش حارق وهدشي لمدة تتراوح ما بين 20 دقيقة إلى 45، الهدف من هذا الإجراء هو التخلص من السموم الموجودة نتيجة العضة.
- من المهم أنكم ماتغسلوش مكان الاصابة بالماء العذب أولا توضعوا الثلج عليها.
- يمكن لينا نستخدموا بعض الأدوية كمسكن موضعي للألم مثل “الليدوكائين” أو نتناولوه عن طريق الفم مثل “الإيبوبروفين” وفحالة لقينا أننا مصابين بحساسية يمكن لينا نستخدموا الكريم الموضعي “مضاد الهيستامين”.
- مانساوش أنه كاينة طريقة لتجنب عضة قنديل البحر من الأساس، وهي استخدام واقي قنديل البحر بحيث أن هناك كريمات واقية من الشمس كتحتوي على مواد طاردة لقنديل البحر، من بينهم كريم “سيف سي”.
و أخيرا خاص التأكيد أنه يجب التوجه إلى الطوارئ فوراً في حال الإصابة بلدغة قنديل البحر بالقرب من العينين.
هادو كانوا أهم النصائح فصحتك اليوم تسنانونا الخميس الجاي فموضوع جديد ونصائح جداد.
